IBON URIBARRI, JOKIN ZAITEGI XXIII.SARIKETAREN IRABAZLEA
Egilea kultura, noiz 2010-02-01 08:19 Atala :
Jokin Zaitegi XXIII.sariketak badu jadanik irabazlea: Ibon Uribarrik jaso du Kutxak eskeinitako beka. Liburua udazkenean aterako da, Durangoko Azokaren bueltan. Saridunak esan digunez "lan sendoa dauka aurretik" Nobel saridunaren Arnasaren kulunka itzultzeko. Esan beharra dago, edizio honetan parte hartze handia izan dela, guztira 15 lan aurkeztu dira, itzulpengintza munduan erreferentzia bihurtu dela esan daiteke Join Zaitegi lehiaketa.
Ibon Uribarri, Filosofian lizentziatu zen EHUn, eta gero Alemaniako eta Ingalaterrako zenbait unibertsitatetan ikasi zuen. Liburu hauek idatzi ditu: Amets harrigarrien bilduma (1988), Denbora eta arrazoimena: esperientziaren batasuna eta jarraitasuna: filosofi transzendentalaren sisteman (1998) eta Inmanuel Kant: bizitza eta filosofia. I. Kanten Arrazoimen hutsaren kritika itzuli du euskarara eta orain nobel saridunaren Arnasaren kulunka itzuliko du euskerara Kutxak eskeinitako bekarekin.
Amaia Antzokia jendez bete zen atzo iluntzean, Maialen Lujanbio txapeldun berriak Arrasaten ze eskeiniko zuen ikusteko. Punta puntako bost bertsolari izan genituen gurean, Igor Elortza, Erica Lagoma, Jon Maia, Andoni Egaña eta Maialen Lujanbio. Boskoteak saio bikaina eskeini zieten bertara gerturatutako guztie. Adin guztietako jendea bildu zen, txikiak, gazteak, helduagoak, baina guztiek ondo pasatu zutela argi ikusi zen euren aurpegietako irribarrean.
AED-k antolatu du aurten ere Amaiako ekitaldi jendetsua. Saioa arratsaldeko 20:00etan hasiko da, eta sarrera bakoitza 10 euroan salduko da. Sarrerak Monte eta Irati tabernetan, eta AEDko Pablo Uranga kaleko 4an eros daitezke. AED-ko bazkideentzat 8 euroan.
Ondorengo bertsolariak arituko dira Amaiako oholtza gainean:
- Andoni Egaña: 48 urte, Zarautz (Gipuzkoa). Bera da Txapelketa Nagusiko egungo txapelduna. 1993an, 1997an eta 2001ean ere txapela jantzi zuen. Finala zazpigarren aldiz jokatuko du.
- Maialen Lujanbio: 33 urte, Hernani (Gipuzkoa). Laugarren Txapelketa Nagusia du, eta 2001ean txapeldunorde izan zen. 2003an Gipuzkoako txapeldun geratu zen. Hernaniko bertso eskolan hasitakoa da.
- Jon Maia: 36 urte, Zumaia (Gipuzkoa). Hiru aldiz abestu du Txapelketa Nagusiko finalean; horietatik bitan, Donostiako belodromoan. Zumaiako bertso eskolan aritutakoa.
- Igor Elortza: 34 urte, Durango (Bizkaia). Bitan izan da finalista Txapelketa Nagusian: 2001ean eta 2005ean. Bizkaikoan bost aldiz jantzi du txapela. Durangoko bertso eskolan trebatutakoa da.
- Erika Lagoma: 28 urte, Lesaka (Nafarroa). Bera da Amaian arituko diren bost bertsolarietatik ezezagunena. Bortziritako bertso eskolan hasi zen bertsotan gaztetik. Hispaniar Filologia ikasketak bukatu dituela, gaur egun, Euskal Filologia ikasten dihardu. 2009ko Nafarroako Bertsolari Txapelketan hirugarren sailkatu zen. 2007ko Nafarroako Bertsolari Txapelketa: laugarren. 2008ko Nafarroako Bertsolari Txapelketa: laugarren. 2009ko Nafarroako Bertsolari Txapelketa: hirugarren.
Sarrerak eskuratu nahi dituenak, Monte eta Irati tabernan eros ditzake edo Pablo Uranga kaleko elkartearen egoitza. Egunean bertan ere sarrerak erosteko aukera egongo da Amaia Udal Antzokiko takilan.
Urtero legez, AEDk martxan jarri ditu Arrasate Literatur lehiaketak, aurtengo XXIII, edizioa izango da. Aldaketa batzuk gauzatu ditugu oinarrietan eta sarietan, beraz, adi-adi jarraitu beharko dituzue aurtengo irizpideak. Guztiok gonbidatea luzatzen dizuegu parte hartzera, aukera ona izan daiteke, gustoko duzun ipuin bat, poema bat, komikia edo bertso paperak kajoitik ateratzeko!
XXII JOKIN ZAITEGI SARIKETAREN IRABAZLEAREN BASARMORTUA LIBURAREN AURKEZPENA ARRASATEN
Egilea kultura, noiz 2009-12-04 08:46 Atala :
Ez zen jende askorik hurbldu atzo kulturateko Jokin Zaitei aretora, baina egon zen jendea gustura entzun zituen Jokin Zaitegi XXII.sariketaren irabazlearen hitzak. Basarmortua eleberria itzuli du Kutxak eskeinitako bekarekin.
Hamar hilabetez, buru belarri murgilduta egon da Basamortua euskarazko lanaren itzultzaile Luis Berrizbeitia eta “harreman oso estua” izan du eleberri honen istorioarekin. Itzulpen lana egiterakoan, jatorrizko testuari zeharo leiala izan edo itzulpen ulergarri bat egiteko hautua aipatu du. Luis Berrizbeitiak, adibidez, euskal onomatopeiak erabili ditu bere lanean, baliabide honek gauzak “argitu, indartu eta etxekotu” egiten baititu.
Liburu hau idazle frantsesaren estilo magiko eta ikuspegi mitikoaren adibide argia da. Nobelaren trama sinplea da oso eta liburuak osatzen dituen 424 orrialdeetan zehar, garai bitan kokatzen diren hari bi nahasten edo paraleloki garatzen dira. Bi bide hauen artean, baina, badago loturarik eta “elkarren arteko oihartzunak” eta bien arteko jokoa sortzen da irakurlearentzat. Batetik, XX. mende hasieran frantsesek fusilaren puntan obratutako Sahararen konkista odoltsua marrazten da; eta bestalde, XX. mende erdialdean matxinatutakoen ondorengo baten istorioa nahasten dira. Neska hau berberea da, Lala izenekoa eta Ipar Afrikako hiri izengabe bateko bazter auzo batean bizi da. Halako batean, etorkin bilakaturik, Marseillara iritsiko da, baina ez du inoiz galduko bere izaera alaia, ez bere begirada aratza, ezta bere jatorriaren oroitzapena ere.
Estilistikoki ere, bi bideak arras ezberdinak dira; bata narratiboagoa, zuzena eta ulerterraza den bitartean; beste bideak, Lala eta bere lurraren eta arbasoen arteko lotura adierazten du modu poetikoan. Modu honetan, bi gizarteen arteko borroka eta tentsioak agertzen dira eleberrian eta “gure gizartera heltzeko atzean geratu diren gizarteak” ekartzen dira gogora Basamortua liburuan. Izan ere, obra honen jatorrizko idazlea, Le Clezio idazlea, Maurizio uhartean, Nigerian edo Mexikon bizi izan zen eta bertako kulturekin harreman zuzena izan zuen. Inperialismo militarrak eta “kolonialismo politiko-militarra zein intelektual-sentimentala” islatzen dira nobelan.
Aurkezpen ekitaldiari amaiera emateko, Basamortua liburuaren pasarte batzuk irakurri ditu Xabier Mendigurenek ahots altuan eta gero, bertaratutakoek, zalantzak zein galderak zuzentzeko aukera ere izan dute.
